هذي وصفات غذائيه للأطفال, وطبعا الوصفه على حسب عمر الطفل ,وهذي من 6 شهور الى سنتين الله يحفظهم لكم
بالنسبه للحليب اذا مثلا يشرب 6 رضعات باليوم نخلي منهم 3 حليب ساده , و3 نظيف لهم
إما سيريلاك , أو نص قطعة بسكويت فارليز ,, أو سيريلاك رز , أو فواكه
الصبح : لازم كل يوم رضعة نشا,, نفس مقادير الحليب اللي يشربه لكن نخليه يغلي ونضيف له نص ملعقة شاي نشا ,, ولما تحسين إنه صار خاثر نبرده ونشربه للطفل
النشا ممتاز وقوي جدا لعظام الطفل ,,
بالنسبه للغداء : نسويله خضار مشكله ( كوسا صغيره,بطاطا صغيره,جزره صغيره,كميه صغيره جدا بقدونس,ملعقتين رز مصري , أو معكرونيه)
نضيف عليهم كوب ونص ماي, ونخليه يغلي على نار هاديه لين مايستوي ,, نخلطه بالخلاطه وناخذ منه الكميه اللي يبيها الطفل ونقدر نحتفظ بالباقي بالثلاجه ليوم واحد
اذا تحبين تقدرين تضيفين للخضار قطعة سمك, أو دجاج, أو لحم ( عادي أو مفروم )
العصر : تقدرين تسوين له خلطة فواكه حلوه ولذيذه (نص موزه,نص تفاحه, نص برتقاله)
نعصر البرتقال ونصفيه, نقشر التفاحه ونبشرها,نهرس الموزه,ونخلطهم مع بعض
أو تقدرين تشترين له فواكه مهروسه وجاهزه بزجاجات مثل ( جيربر, هيرو, ديتيربا, فارليز ), وتاخذين لطفلج الفاكهه اللي يحبها بهذي الزجاجات
المغرب : شربيه عصير,, وبعدها بشوي تقدرين تعطينه رضعة حليب فيها سيريلاك, أو تسوين له سيريلاك بالطريقه اللي كلنا نعرفها
بعد الساعه 9 لاتثقلين عليه بأي شي , خلي آخر رضعه فيها فارليز أو أي نوع من أنواع السيريلاك تكون الساعه 9 , رضعته قبل النوم خليها حليب ساده
مرتين أو 3 مرات بالإسبوع سويله عصير تمر ,, تمرتين تحطين فوقهم ربع كوب ماي مغلي,,وتنتظرين حتى يذوب إهرسيه بالشوكه وصفيه
وخليه بالرضعه وضيفي عليه شوية ماي بحرارة الغرفه عشان لايصير وايد حاو, أو وايد بارد, وخلي طفلج يشربه, التمر رائع وقوي للطفل, مرتين أو 3 مرات بالإسبوع كفايه
هذا الجدول إنتي تقدرين تتفننين فيه, يعني اذا قدمتي لطفلج رضعات فيها سيريلاك
قمح
يعني البيبي يشرب 6 رضعات حليب باليوم , ناخذ منهم 3 رضعات ونوزعها على طول اليوم
2 فيهم سيريلاك قمح,و 1 فيه نص بسكوتة فارليز, والباقي حليب ساده
اليوم اللي بعده 3 رضعات حليب , 2فيهم سيريلاك رز , و 1 فيه نص بسكوتة فارليز, والباقي حليب ساده
اللي بعده , 3 رضعات حليب , 2 فيهم سيريلاك فواكه ,, و 1 فيه بسكوتة فارليز, والباقي حليب ساده
ونرجع مره ثانيه للقمح , يعني نشكل مو كل يوم نفس الشي, انتي وشطارتج,شوفي طفلج شنو يحب وقدميه عشان ياكله , خليه يصير بطبوووط ههههههههههه
يعني إنتي سوي تشكليه , ومو ضروري سيريلاك, لا على حسب طفلج شنو يحب, في أنواع ثانيه مثل ميلوبا,وماننسى إن بعض الأطفال عندهم حساسيه من بعض الأكلات ,
يعني مو كل شي مكتوب نقدر نطبقه ,بالنسبه لكل شي آنا كتبته, كل أم تعرف طفلها وشنو يحب وشنو يكره, في بعض الاطفال مشكلتهم مشكله, شهيتهم ضعيفه
بهالحاله لازم نعطيهم فيتامين ( شراب كيدي ) بإستشارة طبيب, أو صيدلاني , يوصف الفيتامين على حسب عمر الطفل والجرعه المطلوبه
أهم شي لاتنسين الماي , لازم يشرب بكميات كافيه بين فتره وفتره, وشاي الأعشاب تقدرين تسوين له قبل لاينام بساعه , أو وهو نايم تعطينه رضعة أعشاب
إن شاء الله قدرت أفيدكم ولو بجزء بسيط من معلوماتي , والله يعني في شغلات أنا ناسيتها, لأن من 9 سنوات ووقفت خلاص, يعني ناسيه باجي الوصفات هههههههههه
وهذا الموضوع مو منقول طبعا , هذا مني آنا وحبيت أعلمه لخواتي اللي عندهم أطفال وهذي كانت طريقتي بتغذية عيالي, واذا تذكرت أي شي بكتبه لكم من عيوني
طبعا في شغلات لازم تسوينها قبل موعد أكل الطفل لأنها تاخذ وقت على ماتطبخ أو تبرد وانتو عارفين الاطفال مافيهم صبر , واذا بجى يلم عليكم الجيران حاسبو ههههههههههههه
سامحوووني على الإطاله لكن حبيت إني أوصل لكم المعلومه بشرح مفهوم وسهل
موضوع: غذاء طفلك من 6شهور الى سنتين 
الخميس مارس 18, 2010 10:47 pm
